Autoriteti Konkurrencës nis hetimin, nafta në Kosovë shkon në 1.55 euro për litër
Çmimi i naftës në Kosovë ka arritur deri në 1.55 euro për litër, ndërsa Autoriteti i Konkurrencës ka nisur monitorimin e tregut për të shmangur abuzimet.
Rritja e çmimeve të karburanteve në Kosovë ka vazhduar edhe në fillim të javës, me çmimin e naftës që varion nga 1.52 deri në 1.55 euro për litër, në varësi të kompanive që operojnë në treg.
Brenda rreth 10 ditësh, çmimet e derivateve janë rritur me rreth 30 cent për litër. Para përshkallëzimit të konfliktit në Lindjen e Mesme, një litër naftë tregtohej rreth 1.18 euro.
Ndikimi i tensioneve në tregjet globale
Sipas përfaqësuesve të tregut të karburanteve, rritja e çmimeve lidhet drejtpërdrejt me zhvillimet në bursat ndërkombëtare dhe tensionet gjeopolitike në Lindjen e Mesme.
Ekspertët theksojnë se situata në rajon dhe rreziku për ndërprerje të furnizimit global po rrisin pasigurinë në tregjet e naftës, duke shtyrë çmimet në rritje.
Vëmendja është përqendruar veçanërisht te Ngushtica e Hormuzit, një nga korridoret më të rëndësishme për transportin global të naftës. Çdo problem në këtë rrugë detare reflektohet menjëherë në çmimet e tregut.
Autoritetet nisin monitorimin e tregut
Pas rritjes së shpejtë të çmimeve, Autoriteti i Konkurrencës në Kosovë ka nisur monitorimin e të gjitha kompanive që tregtojnë karburante.
Qëllimi i këtij procesi është parandalimi i marrëveshjeve të ndaluara, abuzimit me pozitën dominuese dhe praktikave të bashkërenduara që mund të çojnë në rritje artificiale të çmimeve ose kufizim të konkurrencës në treg.
Institucioni paralajmëroi se çdo marrëveshje apo bashkërendim ndërmjet bizneseve për rritjen e çmimeve përbën shkelje të rëndë të ligjit dhe mund të ndëshkohet me sanksione.
Dallimet e çmimeve në rajon
Në krahasim me Kosovën, çmimet e naftës në Maqedoninë e Veriut mbeten më të ulëta, me rreth 1.16 euro për litër.
Ndërkohë Shqipëria vazhdon të ketë ndër çmimet më të larta të karburanteve në rajon, me rreth 1.90 euro për litër, ndërsa në Serbi çmimi është rreth 1.80 euro për litër.
Rritja e çmimeve lidhet edhe me tensionet ndërkombëtare pas sulmeve në Lindjen e Mesme, që kanë shtuar pasigurinë në tregjet globale të energjisë.
k.jpg)